مرحبا للجميع ..
اني مريم حكمت من العراق واعيش بتركيا عمري 24 سنة ، احب قراءة الكتب والتاريخ وعلم النفس والطبيعة وركوب الدراجة الهوائية وكلش احب السفر وتعلم لغات وثقافات العالم المختلفة واعرف احجي انگليزي وتركي وبديت اتعلم الماني ، واسعى لتطوير ذاتي.
صارلتي ظروف خلتني اتاخر بالدراسة بس بقى هدفي ان اكون مهندسة معمارية ناجحة ومميزة وبعدني اسعى حتى احققه
بالعادة المحيطين بيه يحبطوني ان ما اگدر اكون مهندسة لان بالمدرسة ما جنت قوية الرياضيات واخاف منه كلش وماعندي مهارات قوية بالرسم .
لهذا السبب قررت اشارك بتحدي ال29 يوم والتزم بيه واتعلم الرسم واصير قوية بالرياضيات واخطي اول خطوة تجاه هدف الهندسة المعمارية لان هالمهارتين مهمة جدا للمهندس المعماري
طبعا اني حاولت ان اتعلم الرسم من قبل والي فترة اتدرب على حل المسائل الرياضية واخذت شهادة رياضيات مستوى اول من منصة ادراك الالكترونية بس اريد اوصل لمستوى اعلى بهالمجالين و اضبط اساسيات الرسم وابدي ارسم لوحات بسيطة تخص الطبيعة الصامتة ورسوم معمارية ..
و اصير قوية بالرياضيات واتعامل ويا المسائل الرياضية بكل سلاسة وبدون خوف وتوتر وانتقل من المستوى المتوسط للمستوى المتقدم بالرياضيات
خلال هالتحدي راح اخصص كل يوم ساعة ونص لتعلم الرياضيات واسبوعيا احاول التزم ان احل 100 سؤال وساعة ونص لتعلم وممارسة الرسم
بالنسبة للرياضيات : كورس التفاضل والتكامل من منصة ادراك الالكترونية. وحتى امرن عقلي على حل المسائل الرياضية بشكل سريع راح استخدم تطبيق اسمه ELVATE .
للرسم : راح اتابع دروس الرسم للمبتدئين من قناة الرسام العراقي مصطفى سعدي. وبنهاية التحدي راح اشوفكم اول محاولاتي برسم لوحة ناجحة 🤭.
