منظور ‏بنقطة ‏واحدة ‏

سكچات ‏رسم ‏هندسي ‏ ‏ديكور ‏مطبخ ‏

سكچات ‏رسم ‏هندسي

سكچات ‏رسم ‏هندسي ‏

بعد تدريب عدة مرات عالرسم الهندسي عبر النقل خطوة بخطوة مع شخص معلم .. كدرت ارسم هذا الرسم البسيط وحدي دون مااشوف الصورة او الخطوات 💪💪

سكچات‌ ‏رسم ‏هندسي ‏ديكور ‏داخلي

سكچات ‏رسم ‏هندسي ‏

سكتچات ‏رسم ‏هندسي ‏

تحدي ‏ال29 ‏يوم ‏- ‏ال10 ‏ايام ‏الثانية

هلووو شبااااب

بهالتحدي اني بديت اتعلم رسم🖌 ورياضيات📐 موضوع التفاضل والتكامل. هدفي جان من بداية التحدي ان اكسر الخوف بيني وبين الرياضيات وبين الرسم كذلك حتى اصير مهندسة معمارية تعرف ترسم زين وتعرف تحل مسائل رياضيات بدون خوف .. لان ميصير مهندسة معمارية وتخاف من الرياضيات 😅🤭..

خلال ال10 الثانية جنت مقررة اكمل كورسين رياضيات بس ماصارت لان اكتشفت ان عندي نقاط ضعف بموضوع النهايات وطبعا استغليت هالايام بحل اسئلة حتى اكون اكثر تمرس وسرعة بالحل واعتبر هالشي هو تقدمي لان عرفت طرق واساليب جديدة بحل الرياضيات.

وبالنسبة للرسم فبديت اتحول عالرسم الهندسي وكدرت ارسم منظور مرتب نوعا ما وهالشي انجاز سعيدة بيه😍

بالرياضيات بالاضافة الى كورس ادراك بديت استخدم فيدوهات متنوعة من اليوتيوب حتى اشوف اكبر عدد من طرق الحل والرسم كذلك تركت قناة السابقة وبديت اتابع فيديوهات من قنوات مختلفة لكن الموضوع موحد وهو سكچات للبنايات المعمارية. واشتريت هالاسبوع اقلام رسم خاصة ودرجات متنوعة وهالشي ساعدني اكثر ان اضبط درجات الالوان وخاصة التضليل.
كمية الجهد متفاوته لكنها ساعة ونص كحد ادنى سواء للرياضيات او الرسم. واكيد اني اطمح للاكثر لكني راضية عن النتائج واشوفها مناسبة للجهد الي بذلته.
والشي المهم الي داتعلمه من الرسم هو الصبر والتركيز على تفاصيل الرسمة حتى تطلع مضبوطة قدر الامكان. وكذلك بالنسبة للرياضيات بحيث ان ما امل اذا فشلت بحل مسالة معينة وانما استمر بالمحاولة لحد ماتغلب عليها✊. واني كلش سعيدة كوني داتغلب عالملل والكسل. طبعا واجهني تحدي هالاسبوع وهو لقاح كوفيد واعراضة الجانبية الخفيفة لكن استمريت بالتقدم نحو هدفي والي هو ثابت متغير الرسم والرياضيات😍

اكيد مثل مذكرت فوك ان المصادر تغيرت عندي شوية ولهذا الخطة طرأ عليها بعض التغير مثل دخول مصادر اضافية وهم حذفت نشاط حل 100 سؤال بشكل اسبوعي لان دا اواجه صعوبة بايجاد هالعدد من الاسئلة بخصوص موضوع معين بس استمر بحل الاسئلة المتوفرة عندي. وبالنسبة للرسم فراح اركز بشكل كامل عالرسم الهندسي والمنظور ذو النقطتين.
بالنسبة للرياضيات رغم الوقت يبدو قليل بس راح ابذل جهدي ان اخلص ال3 كورسات بهال10 ايام الجاية عن طريق مضاعفة الجهد وساعات الدراسة.
بهال10 ايام الجاية اريد اكون راسمة 30 سكتچ يخص الرسم الهندسي وبشكل متقن قدر الامكان وكذلك كورسات الرياضيات ال3 من منصة ادراك.
ممتنة لله😊
ممتنة لنفسي جدا
ممتنة لفريق التحدي ومشاركيه.

تحدي ال29 يوم - انجاز ال10

   هلوووو شباب

التحدي الي اني داسوي كل يوم هو ان اتعلم رسم وادرس موضوع جديد بالرياضيات واحل تمارين عليه حتى اتقوى و في المستقبل القريب جدااا ادرس الهندسة المعمارية 😍😍
هدفي ببداية هالتحدي هو ان اكسر الخوف الي بيني وبين الرسم ومسائل الرياضيات الي جنت اشوفها منصة اعدام (بدون مبالغة)😁😅
بهذا التحدي تعلمت شغلات جديدة عن الرسم من خلال متابعة الفيديوهات وتطبيقها مثل انواع الخطوط والمنظور والاشكال الهندسية. واكيد وصارت ايدي اكثر قوة بالرسم ..

بالنسبة للرياضيات فصارت مواضيعه اكثر سهولة مثل المشتقة والمعادلات التربيعية والانية والخطية وزادت سرعتي اكثر بحل المسائل وطبعا هالشي خلا عقلي اكثر تركيزا .
ساعدني تطبيق ادارك كورس التفاضل والتكامل وتطبيق Elevate.
والي اخذ مني جهد 3 ساعات يوميا لكل مادة ساعة ونص.
طبعا اني كلش راضية عن تقدمي وهو مناسب للجهد الي بذلته. لكني اسعى لتحسينه حتى اكون افضل وافضل من مريم الي كانت عليه البارحة.

خلال هذا التحدي تعلمت ان اني اكدر اسوي اي شي وماكو مستحيل لطالما اني عندي ايمان بقدراتي .. وتعلمت شلون اخلي خوفي يتلاشى من اشوف شي صعب عليه وهنا يزيد التحدي حتى اكدر احله😍.
مشاعري حلوة كلش سكينة وراحة داخلية وحمااااااس ان اتقدم واتعلم اكثر خاصة ان التحدي خلاني اتعرف على ناسس كلش يخبلون وايجابيين مثل مروة وزينب 😍😍.
تفاجئت بنفسي ان اني كلش ممكن احب الرياضيات والرسم واكدر اسويهم 💪💪

هدفي لازال ثابت وباقي وهو بناء جسر حب بيني وبين مواد الهندسة المعمارية 👷‍♀️📐🖌🖊.

طبعا اريد اغير بالخطة شوي بحيث اسوي التحدي من الصبح وازيد العمل الى اربع ساعات حتى يكون انجازي اكبر وتركيزي اكثر .. واريد التزم بحل ال 100سؤال خلال كل اسبوع لان هالشي فادي كلش بالاسبوع الاول.
وكلش واثقة ان راح احقق هدفي بنهاية هذا التحدي واكون بانية اساس قوي جدا بالرياضيات .. واساس جيد للرسم كوني مبتدئة.
بالعشر ايام الجاية اريد اكون حاصلة على شهادة مساق التفاضل والتكامل الثاني والثالث وحالة 200 سؤال بخصوص مواضيع المساقين الي راح اكملها .. وراسمه المنظور بشكل جيد جدا.
وان شاءالله احققه 

طبعا اني ممتنه لوجودي بين هيج مجتمع ايجابي مبدع يحفزني 

على الإستمرار والانجاز

ممتنه لنفسي الي دتتغير وتنجز اكثر واكثر 

ممتنه لمرتضى وللفريق على جهودهم لانشاء هيج تحدي حلو مفيد